शुक्रबारदेखि जारी अविरल वर्षाका कारण विभिन्न स्थानमा धनजनको क्षति भएको विवरण प्राप्त भइरहेका छन्। प्रहरी प्रशासनका अनुसार काठमाडौंको नागार्जुन नगरपालिका-३ सिंगल ट्री नजिकै एक व्यक्तिको मृत्यु भएको छ। शनिबार बिहान करिब सवा ११ बजे स्थानीय ट्रपिकल रेष्टुरेन्टको भान्साकोठामा पहिरो खस्दा गोरखाको शहीद लखन गाउँपालिका-६ का २२ वर्षीय मनोज बिकको मृत्यु भएको हो।
मनोज बिक उक्त रेष्टुरेन्टमा किचन हेल्परका रूपमा कार्यरत थिए। पहिरोले रेष्टुरेन्टको भान्साकोठा पुरिँदा बिक गम्भीर घाइते भएका थिए। उनलाई तत्काल उद्धार गरी स्वयम्भुस्थित मनमोहन मेमोरियल अस्पतालमा पुर्याइएको थियो, तर उपचारका क्रममा उनको मृत्यु भएको अस्पताल प्रशासनले जनाएको छ।
यो घटना पछि स्थानीय बासिन्दामा त्रास फैलिएको छ। प्रहरी प्रशासनले पहिरो प्रभावित क्षेत्रमा बसोबास गर्ने स्थानीयलाई उच्च सतर्कता अपनाउन र सुरक्षित स्थानमा सर्ने सल्लाह दिएको छ। निरन्तरको वर्षाका कारण पहिरोको जोखिम बढेकोले प्रशासनले जोखिमयुक्त क्षेत्रमा नजान र सुरक्षित उपायहरू अवलम्बन गर्न सबैलाई आग्रह गरेको छ।
अविरल वर्षाले काठमाडौं उपत्यकासहित देशका विभिन्न भागमा जनजीवन प्रभावित भएको छ। प्रशासनले थप क्षति हुन नदिन पूर्वतयारीमा जोड दिन आग्रह गरेको छ। स्थानीय तहका प्रतिनिधि र सुरक्षाकर्मीहरू उद्धार तथा सहयोग कार्यमा सक्रिय छन्, र प्रभावितलाई आवश्यक सहयोग पुर्याइरहेका छन्।
