काठमाडौं, भाद्र ९ -यस वर्षको ‘युवावर्ष मोती पुरस्कार’ चर्चित बालसाहित्यकार र रङ्गकर्मी केदार श्रेष्ठलाई प्रदान गरिने भएको छ। नेपाली भाषा, कला, र साहित्यको उन्नयनमा श्रेष्ठको उल्लेखनीय योगदानलाई सम्मान गर्न राष्ट्रिय युवा सेवा कोषले उनलाई यो प्रतिष्ठित पुरस्कार प्रदान गर्ने निर्णय गरेको हो।
राष्ट्रिय युवा सेवा कोषले वरिष्ठ साहित्यकार प्रा. रामकुमार पाँडेको संयोजकत्वमा गठित मूल्याङ्कन समितिको सिफारिसका आधारमा श्रेष्ठलाई वि.सं. २०८१ सालको ‘युवावर्ष मोती पुरस्कार’ दिने निर्णय गरेको हो। यो पुरस्कार नेपाली साहित्यमा नवप्रवर्तन र प्रेरणाका लागि स्थापित महत्वपूर्ण सम्मान हो, जसले मोतीराम भट्टको स्मरणमा ४० वर्षमुनिका सर्जकहरूलाई हरेक वर्ष प्रदान गरिन्छ।
केदार श्रेष्ठ बालसाहित्य र रङ्गमञ्चको क्षेत्रका एक कुशल सर्जक हुन् ।। उनले कथा लेखनदेखि निर्देशनसम्मको क्षेत्रमा आफ्नो उत्कृष्टता प्रदर्शन गर्दै आएका छन्। उनको सिर्जनशीलता र परिश्रमले उनलाई समकालीन कला-साहित्यमा एक अविस्मरणीय नाम बनाएको छ।
श्रेष्ठका पाँच बालपुस्तकमध्ये ‘गुलियो स्याउ’ र ‘आइसक्रिम सपना’ नेपाली बालसाहित्यमा विशेष चर्चित छन्। उनले लियो टल्सटायका बालनाटकहरूको अनुवाद पनि गरिसकेका छन्, जुन नेपाली बालसाहित्यमा महत्त्वपूर्ण योगदान मानिन्छ।
रङ्गमञ्चमा उनले आफ्नो विशिष्ट पहिचान बनाउन सफल भएका छन्। थिएटर मल र थिएटर सेन्टर फर चिल्ड्रेन नेपालका संस्थापकका रूपमा उनले नेपाली नाट्य क्षेत्रमा एक नवीन दृष्टिकोण प्रस्तुत गरेका छन्। ‘उपियाँको निवन्ध’, ‘करेसा कन्सर्ट’, ‘मान भर्सेस मती’, ‘बदरङ्ग’, र ‘भोको घर’ जस्ता उनका नाटकहरूले नेपाली रङ्गमञ्चलाई समृद्ध तुल्याएका छन्।
श्रेष्ठले साहित्यकार पारिजातको ‘शिरिषको फूल’ जस्तो कालजयी कृतिलाई रङ्गमञ्चमा जीवित राख्ने साहसिक कार्य गरेका छन्। उनी बालरङ्मञ्चका अन्तर्राष्ट्रिय संगठन आसितेज नेपालका महासचिव तथा नेपाल बालसाहित्य समाजका आजीवन सदस्यको रूपमा पनि सक्रिय छन्।
चलचित्र क्षेत्रमा पनि उनले आफ्नो विशिष्ट छाप छोडेका छन्। अन्तर्राष्ट्रिय महोत्सवमा पुरस्कृत लघु चलचित्र ‘जुनुको जुत्ता’का निर्माता र निर्देशकका रूपमा उनको योगदानले नेपाली चलचित्रलाई नयाँ उचाइमा पुर्याएको छ।
वि.सं. २०४५ मा ज्वालामुखी गाउँपालिकाको सुनखानीमा जन्मिएका श्रेष्ठले नेपाली साहित्य, कला, र रङ्गमञ्चलाई समृद्ध बनाउन आफ्नो जीवन समर्पित गरेका छन्। उनको अविस्मरणीय योगदानलाई सम्मान गर्दै उनलाई यस वर्षको ‘युवावर्ष मोती पुरस्कार’ प्रदान गरिने छ।
