कीर्तिपुर भदौ ११- लोकल युथ नेपाल क्लबले अब आउने शनिबार सिकाईका रंगहरु कार्यक्रम आयोजना गर्ने लागेको छ । कार्यक्रम बिहानको १० बजे सुरु हुनेछ । यो कार्यक्रम नेवा समुदायको समृद्ध सांस्कृतिक सम्पदालाई जोगाउन र उजागर गर्न एक महत्वपूर्ण कदम स्वरूप नेवा खेलकुदका कार्यक्रमहरुको आयोजना गरिंदैछ। कार्यक्रमको उद्देश्य परम्परागत खेलकुद र सांस्कृतिक गतिविधिहरूको पुनरुत्थान र प्रचारप्रसार गर्नु हो। यस कार्यक्रमले समुदायलाई जागरूक बनाउन, युवाहरूलाई आफ्नो सम्पदाप्रति शिक्षित गर्न, तथा नेवा संस्कृति र परम्परागत खेलकुदको संरक्षणका लागि एउटा महत्वपूर्ण प्लेटफर्मको रूपमा भूमिका निर्वाह गर्ने योजना बनाएको छ।
कार्यक्रमले सांस्कृतिक संरक्षणलाई प्राथमिकता दिँदै परम्परागत नेवा खेलकुदको पुनरुत्थानमा जोड दिनेछ। यसका साथै, समुदायका विभिन्न सहभागीहरू र आगन्तुकहरूमा समुदायको भावना र सांस्कृतिक गर्वलाई प्रोत्साहित गर्ने लक्ष्य राखिएको छ।शिक्षाका माध्यमबाट नेवा संस्कृति र परम्पराहरूको जानकारी प्रदान गर्न, साथै सबै उमेरका व्यक्तिहरूलाई रमाइलो र आकर्षक मनोरञ्जन प्रदान गर्ने योजनासमेत रहेको छ। यो कार्यक्रमले नेवा संस्कृति र परम्परागत खेलकुदको महत्वलाई अझ बलियो बनाउने विश्वास लिइएको छ।नेवा समुदायको सांस्कृतिक संरक्षण र परम्परागत खेलकुदलाई पुनर्जीवित गर्ने उद्देश्यले विभिन्न गतिविधिहरूको प्रस्ताव पनि गरिएको छ। यस कार्यक्रममा कार्यशाला, प्रदर्शनी, अन्तरक्रियात्मक सत्र, हेरिटेज वाक, र परम्परागत खेलकुदजस्ता गतिविधिहरू समावेश गरिएका छन्।
कार्यशालामा परम्परागत हस्तकलाका कला जस्तै माटोका भाँडा र काठका मूर्ति बनाउने सीप सिकाइनेछ। साथै, नेवा खानाको पकाउने तरिका प्रदर्शन र परिक्षण गरिनेछ। ऐतिहासिक र सांस्कृतिक सम्पदाका वस्तुहरूको प्रदर्शनीमा नेवा पोशाक र गहनाहरू पनि देखाइनेछन्।कार्यक्रममा नेवा लोककथाहरूलाई जीवन्त बनाउने कथा वाचन सत्र र वृद्धवृद्धाहरूको अनुभव र ज्ञान साझेदारी गर्ने अन्तरक्रियात्मक सत्रहरू पनि आयोजना गरिनेछ। यस्तै, चिलाञ्चो, बाघभैरव, क्वाचो र त ननीसम्मको हेरिटेज वाक आयोजना गरिनेछ।
रञ्जना लिपिको संरक्षण गर्न वर्कशप गरिनेछ भने परम्परागत खेलकुदलाई पुनर्जीवित गर्न लोः दया ख्व दाया, न्याल्त्य ब्यां, कान कान पिच्चा, कतान्मारि, जजंका कासा जस्ता खेलहरू समावेश गरिनेछन्।
यस गतिविधिले नेवा संस्कृतिको संरक्षण, प्रवर्धन र नयाँ पुस्तामा यसको महत्वलाई स्थापित गर्ने लक्ष्य लिएको छ।
कीर्तिपुर नगरपालिकाको स्थानीय संस्कृति, परम्परा तथा युवामुखी कार्यक्रमहरूलाई पुनरुत्थान, संरक्षण, र प्रवर्धन गर्ने लक्ष्यसहित लोकल युथ नेपाल संस्था स्थापना भएको हो। यो संस्था समुदाय र प्रदेशमा सीमित नबसी, ठूला कार्यक्रमहरू संचालन गरेर नेवारी संस्कृति र दाफा संस्कृतिलाई आधुनिक युगमा जगेर्ना गर्दै व्यावसायिक उचाइमा पुर्याउन प्रतिबद्ध छ।
२१ औं शताब्दीमा युवाहरूलाई परम्परागत संस्कृतिको महत्त्व बुझाउँदै यसलाई आर्थिक र व्यावसायिक रूपमा स्थापित गर्नेतर्फ संस्था अग्रणी भूमिकामा रहेको छ। कीर्तिपुर भेगमा यस संस्थाले विविध सांस्कृतिक र समाजसेवी कार्यक्रमहरू संचालन गरी समाजमा सकारात्मक प्रभाव पार्दै आएको छ।
