मंसिर १६ मा हुने स्थानीय तहको उपनिर्वाचनका लागि कीर्तिपुरमा राजनीतिक दलहरू तथा स्वतन्त्र उम्मेदवारहरूले आफ्नो तयारीलाई तीव्रता दिएका छन्। यस उपनिर्वाचनमा कीर्तिपुर नगरप्रमुखसहित वडा नं. १ र वडा नं. ४ का वडाध्यक्ष पदका लागि चुनाव हुँदैछ। यसैबीच, राष्ट्रिय प्रजातन्त्र पार्टी (राप्रपा) ले पनि कीर्तिपुरमा चुनावी अभियानलाई औपचारिक रूपमा प्रारम्भ गर्ने भएको छ।
राप्रपाको चुनाव प्रचारप्रसार अभियानको शुभारम्भ यस मंगलबार पाँगास्थित कृष्ण क्याटरिङमा भव्य कार्यक्रमका साथ गरिनेछ। कार्यक्रममा राप्रपाका केन्द्रीय अध्यक्ष राजेन्द्र लिङ्देन स्वयं उपस्थित हुनेछन्, जसले कार्यकर्तामा नयाँ उत्साह र उर्जा थप्ने विश्वास गरिएको छ। अभियानका लागि स्थापन गरिने कार्यालय उद्घाटन कार्यक्रममा राप्रपाका शीर्ष नेतृत्वसहित स्थानीय नेता तथा कार्यकर्ताहरूको उपस्थिति रहनेछ।
राप्रपाका नेता अजय श्रेष्ठले जानकारी दिएअनुसार, यो कार्यक्रम बिहान ७ः३० बजेबाट सुरु हुनेछ। राप्रपाले यस अभियान मार्फत कीर्तिपुरका मतदातासँग नजिकिँदै आफ्ना योजना र लक्ष्यहरू प्रस्तुत गर्नेछ, जसले मतदातालाई पार्टीप्रति आकर्षित गर्ने अपेक्षा गरिएको छ।
