भक्तपुरको सडकमा पुस १५ मा राजभण्डारी दम्पती सवार स्कुटर दुर्घटना भयो । बागमती प्रदेश–०२–०२८ प ६६१० नम्बरको स्कुटरका चालक ३१ वर्षीय निश्चल प्रकाशराज भण्डारीको उपचारको क्रममा पुस १८ गते साँझ ७ बजे नर्भिक अस्पतालमा मृत्यु भयो ।निश्चलकी पत्नी २८ वर्षीय पूजा श्रेष्ठ स्कुटर पछाडि सवार थिइन् । दुर्घटनामा उनी घाइते भइन्, अहिले नर्भिकमा उपचार हुँदैछ ।
निश्चल र पूजा झापाको भद्रपुर नगरपालिकाकी पूर्व उपप्रमुख चन्द्रामाया श्रेष्ठका छोरा बुहारी हुन् । निश्चलको स्थायी ठेगाना भद्रपुर नगरपालिका ८ हो । दुई वर्षपछि निश्चल र पूजा अस्ट्रेलियाबाट घर फर्किएका थिए । झन्डै एक महिनाको बसाई पश्चात् निश्चल र पूजा फेरि अस्ट्रेलिया जाँदै थिए । अस्ट्रेलिया जान उनीहरू घरबाट बिदा भएर काठमाडौँ फर्किएका थिए । उनीहरूको अस्ट्रेलियाको उड्ने टिकट शुक्रबार रातिको थियो ।
तर, श्रीमतीसँगै निश्चलको फेरि अस्ट्रेलिया जाने सपना बाटोमै एउटा कुकुरले कहिल्यै पुरा नहुने गरी उडायो । मध्यपुर थिमी नगरपालिका–२ स्थित थिमिबाट मगरगाउँतर्फ जान लाग्दा कुकुरले बाटो काट्न खोज्छ । कुकुरलाई जोगाउन खोज्दा स्कुटर अनियन्त्रित भएर दुर्घटनामा भएको पूजाले जानकारी गराएकी जिल्ला प्रहरी परिसर भक्तपुरका डीएसपी ढुण्डिराज नेउपानेले बताए । दुर्घटनाग्रस्त स्कुटर प्रहरी वृत्त थिमीमा राखिएको छ । पूर्व उपप्रमुख तथा अधिवक्ता चन्द्रमाया श्रेष्ठका निश्चल एक्लो सन्तान हुन् । पूजा र निश्चलको विवाह सन् २०२२ मा अप्रिलमा भएको थियो । उनका बुबा दुर्गाबहादुर राजभण्डारी मेची अस्पतालका पूर्व कर्मचारी हुन् ।
