धादिङ, नौबिसे – भक्तपुरबाट देवघाटतर्फ तीर्थयात्राका लागि निस्किएको बस नौबिसेमा दुर्घटनाग्रस्त हुँदा एकजनाको मृत्यु भएको छ भने २४ भन्दा बढी यात्रु घाइते भएका छन्।
दुर्घटना गएराति करिब १० बजे धादिङ जिल्लाको नौबिसे क्षेत्रमा भएको हो। भक्तपुरबाट २९ जना यात्रुहरू लिएर देवघाटतर्फ जाँदै गरेको बा २ ख ‘ नम्बरको बस गुड्दागुड्दै अचानक पत्ता भाँचिएर बीच सडकमा पछाडिपट्टि पल्टिएको प्रारम्भिक अनुसन्धानबाट खुलेको छ।
दुर्घटनामा परी ज्यान गुमाउनेमा दोलखाको तामाकोशी गाउँपालिका–१ निवासी पार्वती काफ्ले रहेकी छिन्। काफ्ले परिवारकै १८ जना दुर्घटनामा घाइते भएका छन्।
घाइतेमध्ये ३ जनाको अवस्था गम्भीर रहेको छ। उनीहरूलाई बाँसबारीस्थित न्युरो अस्पताल, ट्रमा सेन्टर, नेपाल प्रहरी अस्पताल र वीर अस्पतालमा उपचारार्थ भर्ना गरिएको छ। १७ जना घाइतेहरू अस्पतालहरूमा उपचाररत छन् भने ११ जनालाई सामान्य उपचारपछि घर फर्काइएको छ ।
दुर्घटनापछि नेपाल प्रहरी, स्थानीय बासिन्दा र उद्धार टोलीले तत्काल घाइतेहरूको उद्धार गरी उपचारका लागि काठमाडौँ पठाएका थिए। प्रारम्भिक अनुसन्धान अनुसार बसको प्रविधिगत समस्या ९पत्ता भाँचिनु० दुर्घटनाको कारण भएको हुनसक्ने बताइएको छ।
प्रहरीले दुर्घटनाको थप अनुसन्धान गरिरहेको छ भने तीर्थयात्राका लागि लामो दूरीमा यात्रा गर्ने सवारी साधनहरूको प्राविधिक परीक्षण अनिवार्य गर्नुपर्ने आवश्यकतामाथि पुनः एकपटक प्रश्न उठेको छ।
