काठमाडौँ । काठमाडौँ महानगरपालिकाले ऐतिहासिक रानीपोखरीलाई विहान हिँडडुलका लागि खुला गर्ने तयारी गरेको छ। यस उद्देश्यका लागि हाल रानीपोखरीको रङ्गरोगन, मर्मत तथा आवश्यक सुधारका कार्यहरू अघि बढाइएको छ।
आज रानीपोखरीको निरीक्षण भ्रमणपछि महानगरपालिकाका प्रमुख प्रशासकीय अधिकृत प्रदीप परियारले रानीपोखरीलाई विहान हिँडडुलका लागि खुला गर्ने योजना रहेको जानकारी दिए। उनले भने, “रानीपोखरीलाई साँझमा आकर्षक बनाउन रात्रीकालीन प्रकाशको व्यवस्था पनि गरिनेछ। यसले साँझको समयलाई थप सुन्दर र रमणीय बनाउनेछ।”
निरीक्षणका क्रममा प्रमुख प्रशासकीय अधिकृत परियारसँगै प्रशासन विभागका प्रमुख नमराज ढकाल, सूचना प्रविधि विभागका प्रमुख अनिरुद्र नेपाल, महानगर प्रहरी बलका प्रमुख वरिष्ठ नगर प्रहरी उपरीक्षक राजुनाथ पाण्डे, नगर प्रहरी उपरीक्षक विष्णुप्रसाद जोशी, मनोजप्रसाद लामिछाने, नगर प्रहरी नायव उपरीक्षक मीन थापा लगायतका अधिकारीहरू पनि उपस्थित थिए।
निरीक्षणपछि वडाध्यक्ष योगेश खड्गीसँग भएको छलफलमा रानीपोखरीलाई हिँडडुलका लागि खुला गरेपछि स्थानीयबासीलाई खुला ठाउँको सुविधा प्राप्त हुनेमा सहमति भएको छ। यस क्रममा वडाध्यक्ष खड्गीले वडा कार्यालयको भवन साँघुरो भएकाले स्थानान्तरणको आवश्यकता रहेको र स्वास्थ्य प्रवर्धन केन्द्र सञ्चालन गर्न केन्द्रबाट सहयोग आवश्यक रहेको बताए। उनले वडा र केन्द्रका पूर्वाधार निर्माणका काममा समन्वय बढाउनु पर्नेमा जोड दिए।
यसै क्रममा प्रमुख प्रशासकीय अधिकृत परियारले स्वास्थ्य विभागका प्रमुख दिपक के.सी. लाई फोन सम्पर्क गरी आउँदो सात दिनभित्र स्वास्थ्य प्रवर्धन केन्द्र सञ्चालन गर्न निर्देशन दिएका छन्।
रानीपोखरीको निर्माण कार्य वि.सं. १७२३ पौष कृष्ण ४ मा प्रताप मल्लले आफ्ना छोरा चक्रबर्तिन्द्र मल्लको सम्झनामा थालनी गरेका थिए। यो पोखरी निर्माणका लागि पाँच वर्षको समय लागेको थियो। पुनर्निर्माणको काम भने २०७२ सालको भूकम्पपछि थालिएको थियो, जसमा पोखरीको पिँधमा कालीमाटी राख्ने, मन्दिर र पुल निर्माण गर्ने लगायतका कामहरू सम्पन्न गरिएका थिए।
रानीपोखरीको पुनर्निर्माणमा ८ करोड १५ लाख रुपैयाँ लागत लागेको थियो, जसको निर्माण २०७७ साउन ३० गते सम्पन्न भएको थियो। साथै बालगोपालेश्वर मन्दिर र पोखरीको बाहिरी भागको निर्माण पनि लगभग २६ करोड रुपैयाँ लागतमा सम्पन्न गरिएको थियो।
रानीपोखरीको ऐतिहासिक महत्व र यसको पुनर्निर्माण पछि, यसलाई विहान हिँडडुलका लागि खुला गर्ने र साँझको सुन्दरता थप बढाउने योजना काठमाडौँ महानगरपालिकाको लागि महत्वपूर्ण कदम हो।
