तिहारको समापनसँगै काठमाडौं उपत्यकामा छठ पर्वको उल्लासमय शुरुवात भएको छ। सूर्यदेवको पूजा आराधनासहित मनाइने यस पर्वमा आस्थाका साथ नदी, तालतलैया र पोखरी किनारमा विशेष रुपमा घाट निर्माण गरी भव्य रूपमा छठ मनाइँदैछ। विशेषगरी तराई क्षेत्रमा केन्द्रित यस पर्वको लोकप्रियता बढ्दै जाँदा अहिले हिमाल, पहाड, र तराईका विभिन्न क्षेत्रमा पनि यसलाई विशेष महत्वका साथ मनाउने परम्परा स्थापित हुँदै आएको छ।
छठ पर्व सूर्य उपासनाको पर्व हो, जसमा अस्ताउँदो र उदाउँदो सूर्यलाई दूध, जल, र अन्य सामग्री चढाई धन्यवाद ज्ञापन गरिन्छ। यस अवसरमा केराका थम्बा, झिलिमिली बत्ती, अनि रंगीचंगी सजावटका बीच श्रद्धालुहरूले घाटमा सूर्य देवलाई अर्घ्य अर्पण गर्छन्। यस पर्वले आपसी सद्भाव र एकताको सन्देश प्रवाह गर्दै नेपालभर धार्मिक तथा सांस्कृतिक उत्सवको रुपमा विस्तार पाइरहेको छ।
काठमाडौं महानगरपालिकाले यस वर्ष छठ पर्वलाई व्यवस्थित र सुरक्षित बनाउन ८ स्थानमा विशेष व्यवस्थापन गरेको छ। यसका लागि महानगरपालिकाले पोखरी र घाट सरसफाइ, रंगरोगन, र सजावटका साथै अन्य आवश्यक व्यवस्थापन कार्यमा द्रुतता दिएको छ। प्रत्येक स्थानमा सम्बन्धित वडा कार्यालयले पनि प्रत्यक्ष रूपमा सहयोग गर्दै छठ पर्वको व्यवस्थापनमा महत्वपूर्ण भूमिका निभाएको छ।
छठ पर्व मनाउनका लागि महानगरपालिकाले काम गरेको ८ स्थानहरू निम्न छन्:
१. गौरीघाट (वडा नं. ८) २. कोटेश्वर दोभान (वडा नं. ३२) ३. कमल पोखरी (वडा नं. १) ४. वंशीघाट (वडा नं. ११) ५. बालाजु बाइसधारा (वडा नं. १६) ६. धौखेल खोला (वडा नं. १३) ७. कुमारी क्लब (वडा नं. १४) ८. भुवनेश्वरी मन्दिर (वडा नं. १४)
महानगरपालिकाले यी स्थानमा भक्तजनहरूको सहजता र सुरक्षालाई प्राथमिकता दिँदै छठ पर्वका लागि आवश्यक सम्पूर्ण तयारी पूरा गरेको छ। पोखरी र घाट सरसफाइसँगै बत्तीको व्यवस्था र सौन्दर्यकरणमा पनि ध्यान पुर्याइएको छ, जसले श्रद्धालुहरूलाई छठ पर्वको पवित्र वातावरणमा सहभागी हुन मद्दत पुर्याउनेछ।
