कीर्तिपुर नगरपालिका वडा नं १ को वडा अध्यक्ष पदका लागि सम्पन्न उपनिर्वाचनमा नेपाली कांग्रेसका उम्मेदवार इच्छाकुमार महर्जन विजयी भएका छन्। महर्जनले कुल ५६२ मत प्राप्त गर्दै निकटतम प्रतिद्वन्द्वीलाई पछि पार्दै विजयी बनेका हुन्।
शिक्षाको क्षेत्रमा लामो समयदेखि योगदान दिएका र स्थानीय उद्योग व्यवसायको प्रवर्द्धनमा सक्रिय भूमिका खेल्दै आएका महर्जनले आफ्नो जितलाई कीर्तिपुरको समग्र विकास र स्थानीय समुदायको सेवामा समर्पित गर्ने प्रतिबद्धता जनाएका छन्।
चुनावी परिणाम घोषणा भएपछि उनले आफ्नो विजयीलाई स्थानीय जनताको आवश्यकता र अपेक्षालाई प्राथमिकतामा राखेर काम गर्ने अवसरको रूपमा लिएको बताए। “यो जित मेरो व्यक्तिगत मात्र होइन, सम्पूर्ण कीर्तिपुरवासीको जित हो। म समुदायको विश्वासलाई कहिल्यै तोड्ने छैन,” महर्जनले भने।
महर्जन विगतदेखि नै सामाजिक, शैक्षिक, र व्यावसायिक क्षेत्रमा सक्रिय रहँदै आएका व्यक्ति हुन्। उनले सेमरक सिम्रिक प्रि-स्कूलको संस्थापकको रूपमा शिक्षा क्षेत्रमा उल्लेखनीय योगदान पुर्याएका छन् भने साना तथा मझौला उद्योग संघ, कीर्तिपुरको अध्यक्षको रूपमा स्थानीय व्यवसाय प्रवर्द्धनमा अग्रणी भूमिका खेलेका छन्।
महर्जनको नेतृत्वमा वडा नं १ मा समृद्धि र स्थायित्वको अपेक्षा गरिएको छ। अबका दिनहरूमा उनले कस्तो भूमिका निर्वाह गर्नेछन् भन्नेमा सबैको ध्यान केन्द्रित हुने निश्चित छ।
