कीर्तिपुर नगरपालिकाका नव निर्वाचित नगर प्रमुख कृष्णमान डंगोल, वडा नम्बर १ का अध्यक्ष इच्छाकुमार महर्जन, र वडा नम्बर ४ का अध्यक्ष राजेन्द्र बानियाँले आज पद तथा गोपनीयताको शपथ ग्रहण गर्नुभएको छ।
कीर्तिपुर नगरपालिकाका प्रशासन शाखाका वरिष्ठ अधिकृत जनक थापा द्धारा संचालित भव्य समारोहमा जिल्ला अदालतका न्यायधिश र निर्वाचन अधिकृत इन्दिरा कार्कीको उपस्थितिमा निर्वाचित जनप्रतिनिधिहरूले आफ्नो पदको शपथ ग्रहण गर्नुभएको हो। शपथ ग्रहणपछि नगर प्रमुख डंगोलले समृद्ध र सुशासित कीर्तिपुर निर्माणका लागि आफूले कटिबद्ध भएर काम गर्ने प्रतिबद्धता व्यक्त गर्नुभयो। साथै, उहाँले नगरको विकासमा सबै पक्षको सहकार्य र समर्थनको आवश्यकता रहेको उल्लेख गर्दै नागरिकहरूको भरोसा तोड्न नदिने दृढता व्यक्त गर्नुभयो।
शपथ ग्रहण समारोहमा राजनीतिक दलका प्रतिनिधिहरू, स्थानीय नागरिक, नगरपालिकाका कर्मचारीहरुको व्यापक उपस्थिति रहेको थियो।
समारोहको समापनमा उपस्थित सबैले नव निर्वाचित जनप्रतिनिधिहरूलाई बधाई दिँदै सफल कार्यकालको कामना गरेका थिए।
