काठमाडौं, माघ १८ – नेपालमा जलन उपचार सेवाको अभावलाई सम्बोधन गर्दै सरकार कीर्तिपुर अस्पताललाई देशकै प्रमुख बर्न सेन्टरका रूपमा विस्तार गर्ने तयारीमा छ। यस परियोजनामा चौधरी ग्रुपले महत्वपूर्ण भूमिका निर्वाह गर्ने भएको छ।
स्वास्थ्य तथा जनसंख्या मन्त्रालयमा बिहीबार आयोजित बैठकमा स्वास्थ्य तथा जनसंख्यामन्त्री प्रदीप पौडेल, चौधरी ग्रुपका अध्यक्ष एवं सांसद विनोद चौधरी, सांसद चन्द्र भण्डारी, कीर्तिपुर अस्पतालका प्रतिनिधि, बर्न सेन्टरका चिकित्सक तथा सरोकारवालाबीच विस्तृत छलफल भएको थियो। बैठकमा कीर्तिपुर अस्पतालमा अन्तर्राष्ट्रियस्तरको ‘डेडिकेटेड बर्न अस्पताल’ निर्माणका लागि चौधरी ग्रुपसँग सहकार्य गर्दै पहिलो चरणको काम अघि बढाउने समझदारी भएको छ।
सरकारको प्रतिबद्धता र चौधरी ग्रुपको सहकार्य
स्वास्थ्य मन्त्री पौडेलले नेपालमा जलन उपचार सेवालाई सशक्त बनाउन सरकार गम्भीर रहेको उल्लेख गर्दै चौधरी ग्रुपको सहयोगले यस अभियानलाई बल दिने बताए। “माननीय विनोद चौधरीज्यूको पहल तथा आर्थिक सहयोगले सरकारको लक्ष्य हासिल गर्न टेवा पुग्नेछ। अन्तर्राष्ट्रियस्तरको जलन उपचार केन्द्र निर्माण गरेर नेपाललाई जलन उपचारमा आत्मनिर्भर बनाउने हाम्रो उद्देश्य छ,” उनले भने।
चौधरी ग्रुपका अध्यक्ष विनोद चौधरीले नेपालमा जलन उपचार सेवाको अभावलाई मध्यनजर गर्दै यस परियोजनालाई प्राथमिकतामा राखिएको बताए। कांग्रेस सांसद चन्द्र भण्डारीसँगको छलफलपछि उनले नेपालमा पूर्ण सुविधासम्पन्न जलन अस्पताल निर्माणको आवश्यकता महसुस गरेको बताए।
“सांसद भण्डारीज्यूको ग्यास लिक दुर्घटनापछि जलन उपचार सेवाको सीमितताबारे थप स्पष्टता आयो। उहाँले निरन्तर सरकारसँग माग गरे पनि ठोस प्रगति नभएको देखेपछि मैले निजी क्षेत्रबाट पनि योगदान गर्ने निर्णय गरे,” चौधरीले भने।
बर्न अस्पतालको पूर्वाधार विकास र कार्ययोजना
कीर्तिपुर अस्पताल फेक्ट नेपाल र कीर्तिपुर नगरपालिकाद्वारा संयुक्त रूपमा सञ्चालित छ। चौधरी ग्रुपको सहयोगमा जलन उपचार केन्द्रलाई विश्वस्तरीय बनाउने योजना अन्तर्गत आवश्यक पूर्वाधार निर्माण, प्रविधि हस्तान्तरण तथा दक्ष जनशक्ति विकासमा लगानी गरिनेछ।
चौधरी फाउण्डेसनले बैठकमा बर्न अस्पताल निर्माणसम्बन्धी आफ्नो विस्तृत कार्ययोजना प्रस्तुत गरेको थियो। “सरकारसँगको सहकार्यमा तोकिएको समयसीमाभित्रै बर्न अस्पतालको निर्माण सम्पन्न गर्ने हाम्रो प्रतिबद्धता छ,” चौधरी फाउण्डेसनका प्रतिनिधिले बताए।
राष्ट्रिय जलन उपचार केन्द्रको विस्तार योजना
सरकारले कीर्तिपुरमा बर्न अस्पताल निर्माणका साथै अन्य प्रदेशहरूमा समेत जलन वार्डहरूको विस्तार गर्ने योजना अघि बढाइरहेको छ। मन्त्री पौडेलका अनुसार, “देशभरिका जलन उपचार केन्द्रलाई व्यवस्थित गर्दै कीर्तिपुरलाई राष्ट्रिय जलन उपचार केन्द्रका रूपमा विकास गर्ने हाम्रो रणनीति छ।”
यसअघि अघिल्लो सरकारले कीर्तिपुर अस्पताललाई प्रमुख जलन उपचार केन्द्रका रूपमा विकास गर्ने घोषणा गरे पनि कार्यान्वयनमा ढिलाइ भएको थियो। नयाँ सरकार गठनपछि स्वास्थ्यमन्त्री पौडेलले यस योजनालाई तीव्रता दिएका छन्।
नेपालमा जलन उपचारका लागि आवश्यक आधारभूत संरचनाहरू सीमित छन्। यस कारण, उपचारका लागि बिरामीहरूलाई विदेश जानुपर्ने बाध्यता रहँदै आएको छ। चौधरी ग्रुपको सहभागिताले जलन उपचारमा आत्मनिर्भरता बढाउने र गम्भीर जलन भएका बिरामीहरूको प्रभावकारी उपचार सुनिश्चित गर्ने सरकारको लक्ष्य रहेको छ।
यस परियोजनाको प्रभावकारी कार्यान्वयनले नेपालमा जलन उपचार सेवामा उल्लेखनीय सुधार ल्याउने विश्वास गरिएको छ।
