काठमाडौं । त्रिभुवन विश्वविद्यालय (त्रिवि) अन्तर्गत स्वतन्त्र विद्यार्थी युनियन (स्ववियु) निर्वाचनको नतिजा सार्वजनिक भएको छ । विभिन्न आङ्गिक तथा सम्बन्धनप्राप्त क्याम्पसहरूमा सम्पन्न निर्वाचनमा विभिन्न विद्यार्थी संगठनका उम्मेदवार विजयी भएका छन् ।
नेपाल कमर्स क्याम्पस र महेन्द्ररत्न क्याम्पस ताहचलमा अखिल (क्रान्तिकारी) निकट अनेरास्ववियुले विजय हासिल गरेको छ । कमर्स क्याम्पसमा विशाल रोकाहा तथा महेन्द्ररत्न क्याम्पसमा ईश्वर थापा अध्यक्षमा निर्वाचित भएका छन् । अनेरास्ववियुका उपाध्यक्ष नारायण घर्तीका अनुसार दुबै क्याम्पसमा संगठनले प्रभावशाली जित निकालेको छ ।
त्यसैगरी, थापाथली इन्जिनियरिङ क्याम्पस र महाराजगञ्ज नर्सिङ क्याम्पसमा नेपाल विद्यार्थी संघ (नेविसंघ) का उम्मेदवार विजयी भएका छन् । थापाथली इन्जिनियरिङ क्याम्पसमा प्रल्हाद खड्का तथा महाराजगञ्ज नर्सिङ क्याम्पसमा बिन्दु पोखरेल अध्यक्षमा निर्वाचित भएका छन् । नेविसंघका प्रवक्ता सुरज सेजुवालका अनुसार यी क्याम्पसहरूमा संगठनले मजबुत उपस्थिति जनाउन सफल भएको छ ।
अखिल (क्रान्तिकारी) निकट विद्यार्थी संगठन अनेरास्ववियु (क्रान्तिकारी) ले जनप्रशासन क्याम्पस तथा सानोठिमी बहुमुखी क्याम्पस भक्तपुरमा विजय हात पारेको छ । संगठनका महासचिव रोशन मगरका अनुसार जनप्रशासन क्याम्पसमा अनिकेत तिवारी तथा सानोठिमी क्याम्पसमा नरेन्द्र ठगुन्ना अध्यक्षमा निर्वाचित भएका छन् ।
यस्तै, पुल्चोक इन्जिनियरिङ क्याम्पसमा स्वतन्त्र उम्मेदवार स्वयं श्रेष्ठ विजयी भएका छन् । त्रिवि अन्तर्गत देशभर ३८ आङ्गिक तथा २५० सम्बन्धनप्राप्त क्याम्पसमा मंगलबार सम्पन्न स्ववियु निर्वाचनको मतगणना जारी छ । विभिन्न क्याम्पसमा फरक-फरक विद्यार्थी संगठनको वर्चस्व कायम रहँदा सम्पूर्ण नतिजा आउन केही समय लाग्ने अनुमान गरिएको छ ।
