काठमाडौं – एभिन्यूज टेलिभिजनका सञ्चालक भाष्करराज राजकर्णिकारले समयमै प्रहरीलाई जानकारी गराए पनि आगलागीमा परेका आफ्ना सहकर्मीको उद्धार हुन नसकेको गुनासो गरेका छन्।
शुक्रबार राजावादी आन्दोलनका ‘कमाण्डर’ तथा मेडिकल व्यवसायी दुर्गा प्रसाईंको नेतृत्वमा काठमाडौंको तीनकुनेमा भएको प्रदर्शनका क्रममा प्रदर्शनकारीहरूले एक भवनमा आगो लगाएका थिए। सोही आगलागीमा परेर एभिन्यूज टेलिभिजनका क्यामेरा पर्सन सुरेश रजकको मृत्यु भएको हो।
टेलिभिजन सञ्चालक राजकर्णिकारका अनुसार दिउँसो करिब ३ बजेर १७ मिनेटमा सुरेश रजक आगो लागेको भवनभित्र फसेका थिए। “हाम्रो टोली त्यहाँबाट प्रत्यक्ष प्रशारण गरिरहेको थियो। सुरेश त्यहीँ फसेका थिए, हामीले तत्काल सशस्त्र प्रहरी, नेपाल प्रहरी र प्रमुख जिल्ला अधिकारीलाई खबर गर्यौं तर कुनै प्रतिक्रिया प्राप्त भएन,” उनले भने।
उनले घटनास्थलमा रहेका अन्य पत्रकारहरूले भवनभित्र रजक रहेको जानकारी गराए पनि उद्धारका लागि प्रयास नगरेको आरोप लगाए। “सशस्त्र प्रहरीले ‘भित्र कोही छैन’ भन्दै हामीलाई जान दिएन। दमकल झन्डै १ घण्टापछि मात्रै आयो, त्यसपछि थप सहयोग आउन सकेन,” कर्णिकारले भने।
राजकर्णिकारले आगलागीमा फसेका आफ्ना सहकर्मीलाई समयमै उद्धार गर्न नसक्दा पत्रकारको ज्यान गएको भन्दै राज्य संयन्त्रको कमजोरीप्रति गम्भीर प्रश्न उठाएका छन्। “हाम्रा सहकर्मी जीवितै जलिरहेको दृश्य प्रत्यक्ष प्रशारण गरिरह्यौं, तर हामीले केही गर्न सकेनौं। पत्रकारले काम गर्दा गर्दै ज्यान गुमाउनुपर्ने अवस्था आउनु दु:खद छ,” उनले भने।
घटनास्थलमा पुगेका दमकलमाथि समेत प्रदर्शनकारीहरूले ढुंगा प्रहार गरेका कारण उद्धारकार्य थप प्रभावित भएको थियो।
