ललितपुर, २७ जुलाई – राति १०:३० बजे ललितपुरको वडा नं ११ र ९ को सिमाना, सेथु गणेश मन्दिर नजिकै बागमती शंखमुल जाने मुख्य बाटोमा ट्रान्सफर्मर सहितको विद्युत पोल र अन्य पोलहरू ढल्दा ट्रान्सफर्मर नै सडकको बीचमा खसेको छ।
स्रोतका अनुसार, स्थानीय बासिन्दाले पटक-पटक पोलको कमजोर अवस्थाबारे सम्बन्धित निकायलाई जानकारी गराए पनि बेवास्ता गरिएको थियो। यस लापरवाहीका कारण यो दुर्घटना भएको हो।
यो घटना विद्युत प्राधिकरणको चरम लापरवाहीको उदाहरण भएको स्थानीयहरूले बताएका छन्। ट्रान्सफर्मर र पोल ढल्दा सडक अवरुद्ध भएको र यसले आवतजावतमा समस्या उत्पन्न भएको छ। साथै, यस्तो घटनाले स्थानीय बासिन्दा र यात्रुहरूको सुरक्षामा गम्भीर जोखिम पैदा गरेको छ।
सम्बन्धित अधिकारीहरूले तुरुन्तै यसबारेमा आवश्यक कदम चाल्नुपर्ने माग स्थानीयहरूले गरेका छन्। यो दुर्घटनाले विद्युत प्राधिकरणको कार्यप्रति गम्भीर प्रश्न उठाएको छ।
