काठमाडौं – ललितपुर महानगरपालिका–२७, सुनाकोठीस्थित सिभिल होम्सको घर नम्बर ४६ मा आइतबार बिहान आगलागी भएको छ। प्रारम्भिक अनुसन्धान अनुसार, दियोबाट सल्किएको आगोका कारण आगलागी भएको ललितपुर प्रहरी प्रमुख एसपी नरहरि रेग्मीले पुष्टि गरेका छन्।
प्रहरीका अनुसार, सुमनकुमार जोशीको घरको माथिल्लो तलामा रहेको पूजाकोठाबाट आगो सुरु भएको थियो। तत्काल नियन्त्रणका प्रयास गरिए पनि आगो फैलिँदै गएपछि घरका केही भाग जलेको छ। “अहिले आगलागी पूर्ण रूपमा नियन्त्रणमा आइसकेको छ, मानवीय क्षति भएको छैन,” एसपी रेग्मीले जानकारी दिए।
उक्त घटनाबाट घरका बहुमूल्य सामानहरू सुरक्षित रहेको र पूजाकोठाका केही सामग्री मात्र जलेको प्रहरीको प्रारम्भिक प्रतिवेदनले देखाएको छ।
आगो नियन्त्रणका लागि ललितपुर महानगरपालिकाको दमकल, नेपाल प्रहरी, नगर प्रहरी र स्थानीय बासिन्दाहरूको सक्रियता रहेको थियो। घटनाको विस्तृत क्षति विवरण संकलन कार्य जारी रहेको ललितपुर प्रहरीले जनाएको छ।
