ललितपुर महानगरपालिकाले पर्यटकीय प्रवर्द्धनलाई थप सशक्त बनाउने उद्देश्यले विद्युतीय बग्गी (ई–बग्गी) परीक्षण थालेको छ। आन्तरिक तथा बाह्य पर्यटकलाई महानगरभित्रका ऐतिहासिक मठमन्दिर तथा सम्पदा क्षेत्रको अवलोकन गराउने योजनासहित ई–बग्गी सञ्चालनको तयारी गरिएको नगरप्रहरी प्रमुख सीताराम हाछेथुले जानकारी दिएका छन्।
हाल महानगरले होटल गुडविलको सहकार्यमा परीक्षण गर्दैछ। एक महिना लामो परीक्षण सफल भएमा थप चारवटा ई–बग्गी खरिद गरी नियमित सञ्चालन गर्ने योजना रहेको छ।
महानगरपालिकाले पर्यटकलाई पुल्चोक, मंगलबजार, महाविहार, पाटन सुन्धारा लगायतका प्रमुख सांस्कृतिक तथा ऐतिहासिक स्थलहरूमा सहज यात्रा गराउने उद्देश्यसहित ई–बग्गीको अवधारणा अघि बढाएको हो। पर्यावरणमैत्री र नवप्रवर्तनमुखी यो पहलले ललितपुरको पर्यटन क्षेत्रमा नयाँ आयाम थप्ने अपेक्षा गरिएको छ।
तस्बिर : नेपाल फोटाे लाइब्रेरी
