२०३६ सालको पञ्चायती दमन देखि अहिले सम्म निरन्तर सांगतिक यात्रामा एकचित्त भएर लागी परेका संगीतकर्मी गुजय मालाकारले गत आइतबार एक पत्रकार सम्मेलन गरी सांगितिक कार्यक्रम गर्ने जानकारी दिएका छन् । इन्द्रेणी सांस्कृतिक समाजको आयोजनामा यही आँउदो जेठ ३२ गते शुक्रबार मालाकारले कार्यक्रममा १२ वटा गीत गाउने छन् । त्यस मध्ये ९ वटा गीतहरु लाइभ अकेस्ट्रामा प्रस्तुत हुने छ र अर्को ८ वटा ट्रयाकमा प्रस्तुत गरिने छ । कार्यक्रममा जुजु काजी रंजित, सतिस महर्जन, दिपा महर्जन, रत्न शोभा महर्जन लगायत अन्य १६ जना गायकगायिकाले साथ दिनेछन् ।
झन्डै ५ दशक देखि कीर्तिपुरको टोलटोलमा आयोजना हुने सत्यनारायण व्रतको पुजामा गुजय मालाकारका भजन र गीत नसुनेकाहरु कमै होलान । अहिले पनि यी तिखो र तेजिलो स्वरका धनी द्धारा स्वरबद्ध गीतहरुले मानिसहरुलाई मोहित बनाएकै छ । केही समय अघिको समाज संगीतले गुजारा चलाउन सकिन्छ भन्ने कुरा स्वीकार्न तयार थिएन । तर अथक र निरन्तर प्रयास, कठीन साधनाले आज संगीत नै गुजयको पेशा बन्यो र समाजमा ईज्जत र मान प्रतिष्ठा कमाउन सफल पनि भए ।
मध्यम वर्गीय परिवारमा जन्मे हुर्केका गुजय सानै उमेर बाटै भजन तर्फ आकर्षित भए र उनको त्यही लगाव र साधनाका कारण सांगीतिक क्षेत्रमा उनको छुट्टै पहिचान छ । प्रगतिशील र बाल संगीत उनका विधा हुन् । देश र जनताका पक्षमा गुजय मालाकारले आफ्ना धेरै सिर्जनाहरु मार्फत परिवर्तनमा योगदान पुराएका छन् । उनी बिना कीर्तिपुरमा हुने कुनै पनि सांगितिक कार्यक्रमका डबली अपुरो मानिन्छन् । मालाकारले नेपाल भाषा र नेपाली भाषाका लगभग १०० वटा गीतहरुमा संगीत दिइसकेका छन् र त्यति नै गीतहरुमा स्वर पनि दिइसकेका छन् ।
