कीर्तिपुर नगरपालिकाको सहयोगमा इन्द्रेणी सांस्कृतिक समाज (इसास २०४४) ले “हुलाप्याखं महोत्सव २०८१” आयोजना गर्ने भएको छ। जननृत्य गुरु हरिकृष्ण दर्शनधारीको स्मृति दिवस र राष्ट्रिय बाल दिवस २०८१ को अवसरमा आयोजना गरिने यो महोत्सवकीर्तिपुरमा सांस्कृतिक धरोहरको संरक्षण र प्रवर्द्धन गर्ने उद्देश्यले आयोजना गरिएको हो। इन्द्रेणी सांस्कृतिक समाजका वरिष्ठ संगीतकर्मी वीरप्रसाद भन्सारीले यसबारे जानकारी दिएका छन्।
नेपाली संवत ११४४, एकादशीका दिन, अर्थात् २०८१ भाद्र २९ गते शनिबार, दिउँसो १२:३० बजे कीर्तिपुरको वडा नम्बर १० मा अवस्थित मंगल माध्यमिक विद्यालयमा यो भव्य हुलाप्याखं महोत्सव आयोजना गरिनेछ। महोत्सवमा कीर्तिपुर नगरका विभिन्न १७ देखि १८ वटा विद्यालयहरूले भाग लिनेछन्।
भन्सारीका अनुसार, यस महोत्सवले बालबालिकाको प्रतिभा उजागर गर्न र उनीहरूलाई अतिरिक्त क्रियाकलापमा सहभागी गराउन ठोस भूमिका खेल्नेछ। विशेष गरी हुलाप्याखं नृत्यजस्ता सांस्कृतिक विधाहरूको संरक्षण र प्रोत्साहन गर्ने उद्देश्यले यो कार्यक्रमलाई विशेष महत्व दिइएको छ। यस महोत्सवले सांस्कृतिक धरोहर बचाउने कामसँगै बालबालिकाहरूलाई सांस्कृतिक जरा र परम्परामा आधारित क्रियाकलापमा अभिप्रेरित गर्नेछ।
यो महोत्सव कीर्तिपुर नगरपालिकाको विशेष सहयोगमा आयोजना हुँदैछ। नगरपालिकाको कार्यबाहक मेयर शुभलक्ष्मी शाक्यको प्रमुख आतिथ्यमा महोत्सव सम्पन्न गरिनेछ। बाल दिवस २०८१ र जननृत्य गुरु हरिकृष्ण दर्शनधारीको स्मृतिमा यो महोत्सव सांस्कृतिक सम्पदाको सम्मानमा एक महत्वपूर्ण कदम हुनेछ।
इन्द्रेणी सांस्कृतिक समाजले सम्पूर्ण कीर्तिपुरवासी र कला प्रेमी जनसमुदायलाई महोत्सवमा उपस्थित भएर कार्यक्रमलाई सफल बनाउन आग्रह गरेको छ।
