काठमाडौं, माघ १८ – चर्चित गायिका एलिना चौहानले पति विष्णु सापकोटाविरुद्ध काठमाडौं जिल्ला अदालतमा सम्बन्धविच्छेदको मुद्दा दायर गरेकी छन्।
चौहानले अदालतमा दायर गरेको निवेदनमा पतिले शङ्का-उपशङ्का गर्दै आफ्नो चरित्रमाथि प्रश्न उठाउने, पेशागत काममा अवरोध पुर्याउने जस्ता कारणले दाम्पत्य सम्बन्ध सुमधुर रूपमा अगाडि बढ्न नसकेको उल्लेख गरिएको छ।
गायिका चौहानले आफ्नो पेशागत जीवनका कारण कार्यक्रमहरूमा अबेरसम्म बस्नुपर्ने अवस्था आउँदा पतिले बारम्बार शङ्का व्यक्त गर्ने, फोनमार्फत दबाब दिने तथा मानसिक तनाव दिने गरेको आरोप लगाएकी छन्।
उनको निवेदनमा भनिएको छ, “म कलाकारिताको क्षेत्रमा सक्रिय भएकाले कार्यक्रमहरूमा सहभागी हुन अबेरसम्म बस्नु पर्ने हुन्छ। तर, पतिले शङ्का गर्दै बीचमै फोन गरेर घर फर्किन बाध्य पार्ने, चरित्रमाथि शङ्का उपशङ्का गर्ने, मानसिक तनाव दिने गरेका कारण हाम्रो वैवाहिक सम्बन्ध सुमधुर रूपमा अगाडि बढ्न सकेन।”
उनले नेपाल फर्किएपछि पनि कलाकारितासम्बन्धी गतिविधिहरूमा सक्रिय रहँदा पतिले विभिन्न आरोप लगाउँदै चरित्रमाथि प्रश्न उठाउने गरेको दाबी गरेकी छन्। यस्तो अवस्थामा वैवाहिक सम्बन्ध औपचारिक रूपमा मात्र कायम राख्नुको अर्थ नरहेको बताउँदै उनले मुलुकी देवानी संहिता, २०७४ को दफा ९५ (ग) अनुसार सम्बन्धविच्छेदको माग गरेकी छन्।
चौहानले अंश वा कुनै पारिवारिक सम्पत्तिमा दाबी नगर्ने उल्लेख गर्दै अदालतलाई सम्बन्धविच्छेदको प्रक्रिया अघि बढाइदिन अनुरोध गरेकी छन्।
गायिका चौहानले गएको वैशाख ५ गते गीतकार तथा व्यवसायी विष्णु सापकोटासँग विवाह गरेकी थिइन्। सापकोटा बागलुङका स्थायी बासिन्दा हुन् र हाल अष्ट्रेलियामा व्यवसाय सञ्चालन गर्दै आएका छन्। चौहान भने झापाकी स्थायी बासिन्दा हुन्।
केही महिनामै सम्बन्धविच्छेदको चरणमा पुगेको यो वैवाहिक सम्बन्धले नेपाली संगीत तथा समाजमा चासोको विषय सिर्जना गरेको छ। अदालतले यस विषयमा थप कारबाही अघि बढाउनेछ।
