नकपुरधाम । महोत्तरी जिल्लाको भंगहा नगरपालिकामा हालका दिनमा गम्भीर विवाद उत्पन्न भएको छ। सोमबार नगरपालिकामा कार्यरत अधिकारी सूर्य नारायण ठाकुरमाथि कार्यालयकै कार्यकक्षभित्र वडानम्बर ९ का मुकेशकुमार यादवद्वारा हातपात गरिएको घटना सार्वजनिक भएपछि नगरपालिकाका सम्पूर्ण कर्मचारीहरुले आक्रोशित हुँदै विरोधमा उत्रिएका छन्।
घटनाको विरोधमा मंगलबार कर्मचारीहरुले कार्यालयको नियमित कामकाज ठप्प पारेका छन्। कर्मचारीहरुको यो आक्रोश केवल कार्यस्थलमा हिंसात्मक आक्रमणको विरोध मात्र नभएर सम्पूर्ण नगरपालिकामा कर्मचारीहरुको सुरक्षा सुनिश्चित गराउन केन्द्रित रहेको छ।
कर्मचारीहरुले कडा चेतावनी दिँदै दोषीमाथि शीघ्र छानबिन गरिनुपर्ने र कडा कारबाहीको माग गरेका छन्। उनीहरुको भनाइ छ कि जबसम्म आक्रमणकारीलाई कानूनी प्रक्रियामा ल्याएर कडा सजायँ दिइँदैन, तबसम्म नगरपालिकाबाट प्रदान गरिने सबै अत्यावश्यक बाहेकका सेवाहरु पूर्ण रूपमा ठप्प रहनेछन्।
कर्मचारीहरुले नगरपालिकामा काम गर्ने वातावरण असुरक्षित भएको बताएका छन्। यो घटनाले राष्ट्रसेवक कर्मचारीहरुको जीउज्यानको सुरक्षामा गम्भीर प्रश्न उठाएको छ। उनीहरुले भने, “हामीले नगरपालिकामा काम गर्दा हामीलाई सुरक्षा र काम गर्ने वातावरणको प्रत्याभूति हुनुपर्छ।”
नगरपालिकाको कार्यालयको ढोकामा विरोधका नाराहरु टाँसिएका छन्, जसमा कर्मचारीहरुले आफ्नो सुरक्षा सुनिश्चित नगरेसम्म कुनै पनि सेवा प्रवाह नगर्ने बताएका छन्।
यो घटना न केवल भंगहा नगरपालिकाका लागि, तर समग्र राष्ट्रसेवक कर्मचारीहरुको सुरक्षाका लागि गम्भीर चुनौतीको रूपमा देखा परेको छ। सरकार र सम्बन्धित निकायले तुरुन्तै हस्तक्षेप नगरेको खण्डमा यो विवाद अझै गम्भीर रूप लिन सक्ने चेतावनी कर्मचारीहरुले दिएका छन्।
