ढाका । बंगलादेशमा आरक्षण विवादलाई लिएर चर्किएको आन्दोलन हिंसात्मक बनेपछि प्रधानमन्त्री शेख हसिनाले राजीनामा दिएर देश छोडेकी छन्। आन्दोलनकारीहरूको चर्को दबाब र हिंसात्मक प्रदर्शनका कारण हसिनाले राजीनामा दिँदै छिमेकी देश भारततर्फ पलायन भएकी हुन्।
प्राप्त समाचारअनुसार हसिना आफ्नी बहिनीसँगै हेलिकप्टरमार्फत भारतको अगरतलातर्फ गएकी छन्। प्रधानमन्त्रीको सरकारी निवास गणभवनबाट उनीहरूलाई सुरक्षित स्थानमा लैजान सैनिक हेलिकप्टर प्रयोग गरिएको थियो। यस क्रममा प्रधानमन्त्री हसिनाले वक्तव्य जारी गर्न खोजेकी थिइन्, तर उनलाई त्यो अवसर दिइएन।
आरक्षणको विषयलाई लिएर सरकारी जागिरमा असन्तुष्ट विद्यार्थीहरूले सुरु गरेको प्रदर्शन हिँसात्मक बन्न पुग्दा ९० जनाभन्दा बढीको मृत्यु भएको छ भने सयौं व्यक्ति घाइते भएका छन्। यसले देशव्यापी अस्थिरता निम्त्याएको छ। प्रदर्शनकारीहरूले प्रधानमन्त्रीको तत्काल राजीनामा माग गर्दै चर्को आन्दोलन सुरु गरेका थिए, जसले अन्ततः प्रधानमन्त्रीलाई पदत्याग गर्न बाध्य बनायो।
बीबीसी बाङ्ला र अन्य सञ्चारमाध्यमका अनुसार प्रधानमन्त्रीले देश छोडेको थाहा पाएपछि हजारौँ प्रदर्शनकारीहरू ढाकास्थित सरकारी निवास गणभवनमा प्रवेश गरेका थिए। टेलिभिजनमा प्रसारित दृश्यमा केही प्रदर्शनकारीहरूले गणभवनमा लुटपाट गरिरहेको र सरकारी सम्पत्ति नष्ट गरिरहेको देखिन्छ। सोफासहितका फर्निचरहरू बोकेर हिँडिरहेको दृश्य पनि सार्वजनिक भएको छ।
प्रधानमन्त्रीको पलायनपछि बंगलादेशमा स्थिति थप तनावपूर्ण बनेको छ। देशको बिग्रदो अवस्थालाई ध्यानमा राख्दै सेनाप्रमुख वाकर युज जमाने राष्ट्रका नाममा सम्बोधन गर्दै बंगलादेशमा अन्तरिम सरकार बनाउने घोषणा गरेका छन्। उनले शान्ति कायम गर्न र हिंसात्मक आन्दोलनलाई रोक्नका लागि सेना परिचालन गर्नुपर्ने बताए।
सेनाप्रमुखले सेनाले देशको शासन सत्ता हातमा लिएको जानकारी गराउँदै हिंसा रोक्न र देशलाई स्थायित्वतर्फ उन्मुख गर्नका लागि आफूले कदम चालेको स्पष्ट पारे। देशमा जारी अशान्तिलाई अन्त्य गर्न सेनाले नागरिकलाई शान्तिपूर्ण रहन र राष्ट्रलाई सहयोग गर्न अपिल गरेको छ।
बंगलादेशमा सेनाको शासन सुरु भएको छ, र देशमा शान्ति कायम गर्नका लागि सेना प्रमुखले कडा कदम चाल्ने संकेत गरेका छन्। भविष्यमा बंगलादेशको राजनीतिक स्थितिमा के परिवर्तन आउँछ भन्ने विषयमा अहिले सबैको ध्यान केन्द्रित भएको छ।
